छत्रपती संभाजीनगर : जालना रोडवरील आकाशवाणी चौकात भंगार व्यावसायिकाची भररस्त्यात हत्या; सीसीटीव्हीच्या आधारे दोन संशयित ताब्यात छत्रपती संभाजीनगर | प्रतिनिधी छत्रपती संभाजीनगर शहरातील जालना रोडवरील आकाशवाणी चौकात एका भंगार व्यावसायिकाची भररस्त्यात चाकूने भोसकून हत्या करण्यात आल्याची धक्कादायक घटना समोर आली आहे. हा हल्ला परिसरातील सीसीटीव्ही कॅमेऱ्यात कैद झाला असून, पोलिसांनी तांत्रिक तपासाच्या आधारे अवघ्या काही तासांत दोन संशयितांना ताब्यात घेतले आहे. या घटनेमुळे शहरातील कायदा व सुव्यवस्थेबाबत पुन्हा एकदा प्रश्नचिन्ह निर्माण झाले आहे. मृत व्यावसायिकाचे नाव अब्दुल बासित खान (रा. केसर कॉलनी) असे असून ते भंगार खरेदी-विक्रीचा व्यवसाय करत होते. मिळालेल्या माहितीनुसार, बुधवारी रात्री साडेनऊच्या सुमारास अब्दुल बासित खान हे नेहमीप्रमाणे जेवणासाठी घरी आले होते. त्याचवेळी त्यांना एका व्यक्तीचा मोबाईलवर फोन आला. त्यानंतर रात्री सुमारे दहा वाजण्याच्या सुमारास ते पुन्हा घराबाहेर पडले. "मित्राला भेटून लगेच परत येतो," असे त्यांनी पत्नीला सांगितले होते. मात्र त्यानंतर ते घरी परतले नाहीत. पहाटे दोन ते अडीच वाजण्याच्या सुमारास आकाशवाणी चौकातील पंचम बारसमोर काही नागरिकांना एक व्यक्ती रक्ताच्या थारोळ्यात पडल्याचे दिसून आले. त्यांनी तात्काळ पोलिसांना माहिती दिली. माहिती मिळताच पोलिसांनी घटनास्थळी धाव घेत गंभीर जखमी अवस्थेतील अब्दुल बासित खान यांना घाटी रुग्णालयात दाखल केले. मात्र उपचार सुरू करण्यापूर्वीच डॉक्टरांनी त्यांना मृत घोषित केले. घटनास्थळाची पाहणी करताना पोलिसांना मृताच्या खिशात ₹५०० च्या नोटा मिळाल्या, मात्र त्यांचा मोबाईल फोन गायब असल्याचे आढळले. त्यामुळे सुरुवातीला मोबाईल लुटण्याच्या उद्देशाने हल्ला झाला असावा, असा प्राथमिक संशय व्यक्त करण्यात आला. दरम्यान, या संपूर्ण घटनेचे सीसीटीव्ही फुटेज पोलिसांच्या हाती लागले आहे. फुटेजमध्ये दोन हल्लेखोर अब्दुल बासित खान यांच्यावर अचानक चाकूने वार करून घटनास्थळावरून पळून जाताना दिसत आहेत. सीसीटीव्ही फुटेज आणि तांत्रिक तपासाच्या आधारे गुन्हे शाखेने वेगाने तपास करत अवघ्या काही तासांत दोन संशयितांना ताब्यात घेतले आहे. त्यांची सध्या सखोल चौकशी सुरू असून, हत्येमागील नेमके कारण शोधण्याचे काम सुरू आहे. डॉक्टरांच्या माहितीनुसार, हल्लेखोरांनी अब्दुल बासित खान यांच्या मांडीवर चाकूचे वार केले होते. त्यामुळे मोठ्या प्रमाणात रक्तस्राव झाला आणि उपचार सुरू करण्यापूर्वीच त्यांचा मृत्यू झाला. शहरातील सर्वाधिक वर्दळीच्या जालना रोडवर ही घटना घडल्यामुळे व्यापारी आणि नागरिकांमध्ये भीतीचे वातावरण निर्माण झाले आहे. भररस्त्यात झालेल्या या हत्येमुळे शहराच्या सुरक्षा व्यवस्थेवरही गंभीर प्रश्न उपस्थित होत आहेत. तपास सुरू पोलिसांकडून हत्येमागील नेमके कारण शोधण्याचे काम सुरू आहे. प्राथमिक माहितीनुसार आर्थिक व्यवहारातून वाद झाल्याची शक्यता तपासली जात आहे. मात्र पोलिसांनी अद्याप अधिकृतपणे हत्येचे कारण जाहीर केलेले नाही. तपास पूर्ण झाल्यानंतरच संपूर्ण सत्य समोर येणार आहे.